SunStar : Bakud suporta sa Bongbong-Sara tandem

25 January 2022

By SunStar

Pormal nga gi-anunsyo sa partidong Barug Alang sa Kauswagan ug Demokrasya (BAKUD) sa kinto distrito ang ilang pagsuporta sa tandem nila ni Presidential aspirant Ferdinand “Bongbong” Marcos Jr. ug Davao City Mayor Sara Duterte-Carpio sa umaabot nga eleksyon.

Kini maoy gi-pahibaw ni Danao City Mayor Ramon Durano III atol sa press conference sa Martes, Enero 25, 2022 nga gipatawag sa partido sa Danao City.

“The Bakud party proudly announces that we are and shall be supporting the BBM-SARA UniTeam for the Presidency and the vice presidency,” matod niya.

Matod ni Durano nga si Marcos suod nga higala sa ilang pamilya ilabi na si Duterte-Carpio nga dunay mga gigikanan sa dakbayan sa Danao.

Dugang sa mayor nga ang pag-endorso sa partido walay gipangayo nga baylo apan buot lang niini nga suportahan ang tandem isip tabang nga modaog sa umaabot nga piniliay sa Mayo 2022.

Nagtuo usab si Durano nga adunay kapasidad si Marcos nga mangulo sa nasud ilabi na sa paghaw-as gikan sa nasinati nga pandemya.

“Kani ang certain is the position of BAKUD and the fifth district... ang kaning ensorsement sa Bakud ni BBM and Inday Sara is unconditional so ang purpose ra gyud ang BAKUD makatabang sa ilang kadaogan sa fifth district... the officials under Bakud know we can help sa ilang victory dinhi sa fifth district. Our friendship is beyond politics,” matod ni Durano.

“Since the pandemic we need a president that can unite the country so for us to recover and sa among closeness ni BBM I see him as a good person, mao mana atong makita di siya palaaway, di siya mayabang so i think that is a good quality sa usa ka leader to unite the country... makita na nato kay whatever the allegations sa iyang amahan, dili man giiingong nga ang the sin of the father is the sin of the son,” dugang niya.

Gipasabot ni Durano nga nahibawo na si Marcos lakip na si Senador Imee Marcos sa endorsement niini sa UniTeam.

Giklaro ni Durano nga malipay ang partido kon sila ang pilion nga i-endorso sa UniTeam apan kon dili man gani, padayon silang mo suporta kanila.

“Kon i-endorse mi, kinsa may di malipay, but sa akong giingon wa man ni kondisyon. Kon dili kami okay ra sad kay di man ko seloso. Ang importante lang ang among friendship,”matod ni Durano.

Atol sa tigum, wala si kanhi tourism Secretary ug gubernatorial aspirant Ace Durano tungod kay kasamtangan kining nag-isolate human nga nakahimamat og nagpositibong kaso sa covid-19.

Gipadayag hinuon sa mayor nga huwaton lang una ang desisyon ni Ace ug tandem niini nga si incumbent Vice Governor Hilario Davide III kon kinsang presidential aspirant ang ilang paluyohan.

Una na hinuon nga nipadayag si Ace nga suportahan niini si Davao City Mayor Inday Sara Duterte-Carpio.

Sa pagkakaron, wala pa’y pormal nga gianunsyo ang Durano-Davide tandem sa paluyohan niini nga presidente sa umaabot nga piniliay sa 2022.

Apan si Davide gipaabot nang toa misuporta kang Bise Presidente Leni Robredo.