Join the campaign (Learn More)

RMN News : BBM-Sara UniTeam, may apela sa CHED tungkol sa nakatakdang pagtaas ng matrikula

News & Interviews
13 January 2022

By RadyoMaN Manila | RMN News

Umapela ang BBM-Sara UniTeam sa Commission on Higher Education (CHED) na ipagpaliban muna ang nakaumang na tuition hike ng 56 na Higher Education Institutions (HEIs) para sa academic year 2021-2022.

Giit nina presidential aspirant Ferdinand ‘Bongbong’ Marcos, Jr. at running mate nito na si Davao City Mayor Sara Duterte, ang tuition hike ay lalo lamang makakadagdag sa paghihirap na dinaranas ng mga pamilyang Pilipino dahil sa pandemiya.

Anila, naiintindihan nila na kailangan ding kumita ng mga HEIs para mapanatili ang kanilang operasyon.

Gayunpaman, kailangan pa rin nating isaalang-alang ang kakayahan ng bawat pamilya na matustusan ang pag-aaral ng kanilang mga anak.

Batay sa listahan ng CHED, 14 na HEIs sa National Capital Region (NCR) ang pinayagang magtaas ng kanilang tuition at iba pang school fees.

Makikita rin sa listahan ang bilang ng mga HEIs sa iba’t ibang rehiyon na pinayagang magtaas: sa Rehiyon 1, walo; Rehiyon III, pito; Rehiyon IV, tatlo; Rehiyon V, lima; Rehiyon VI, apat; Rehiyon VII, isa; Rehiyon IX, isa; Rehiyon X, siyam; Rehiyon XI, tatlo; at sa CAR, isa.