Target ni Marcos na mabawi ng PH ang titulo bilang hari ng agrikultura sa Asya

Dapat ibuhos ng gobyerno ang suporta sa isang programa para ibangon muli ang naghihingalong sektor ng agrikultura sa bansa at muli tayong maging pangunahing pwersa sa agrikultura sa buong Asya, ayon kay Senator Ferdinand “Bongbong” R. Marcos, Jr.

Sa kanyang mensahe sa “Araw ng Agrikultura” sa Baler, Aurora nitong Lunes inihayag ni Marcos ang kanyang pangarap para sa isang Pilipinas na makakatayo sa sariling paa at mapapakain ang sariling mamamayan at sandigan ang isang malakas at malagong sektor ng agrikultura na nagpapatakbo ng ating magandang ekonomiya.

“Todohin ang paglago ng agrikultura sa bansa. Ipanumbalik natin ang estado ng bansa bilang isang higante sa larangan ng agrikultura,” ani Marcos sa probinsya ng Aurora kasabay ang papuri sa mga lider ng bayan sa pagbigigay ng halaga sa sektor ng agrikultura.

Dumalo ang Senador sa Araw ng Agrikultura ng Aurora bilang panauhing pandangal at buksan ang Agri Trade Fair nito.

Nakakalungkot ani Marcos ang patuloy na paghina ng ating agrikultura na makikita sa pagbagsak ng kontribusyon ng sektor sa ating ekonomiya na umabot sa 30 porsyento noong katatapos ang digmaan at bumagsak sa 11 porsyento na lamang sa kasalukuyan.

“Ang masaklap pa rito, nauugnay ang agrikultura sa matinding kahirapan. Sa lahat ng mga manggagawa sa buong Pilipinas, pinakamababa ang sahod ng mga nasa sektor ng agrikultura at marami sila: 37% ng manggagawang Pinoy ay nasa sektor ng agrikultura,” ani Marcos.

Dahil sa kakulangan sa puhunan, mataas na presyo ng “farm inputs” at mababa naman ang presyo sa bentahan ng kanilang ani marami sa mga magsasaka ang patuloy na lumulubog sa kumunoy ng utang, ayon sa senador.

Mas lumalala pa ang sitwasyon kung tamaan ng bagyo at iba pang kalamidad ang mga magsasaka, dagdag pa niya.

“Biktima na ng mataas na bilihin at kapitalismo, tapos, dalawang beses pang mabibiktima ng kalamidad. Suwerte na lang ang iba kung balik-puhunan, pero marahil ang karamihan ay nalugi—at nabaon sa utang,” ani Marcos.

Ang masama pa, wala umanong emergency fund na magagamit para sa madaliang pagkukumpuni ng mga nasirang irrigation system at tingi-tinging implementasyon ng malalaking proyekto para sa irrigation, ayon sa senador.

Dagdag na dagok pa rin ang mga naglipana na mga murang produkto na galing ibang bansa na inaangkat dito sa mababang halaga, gawa ng globalisasyon at ng ASEAN integration, bukod pa sa mga smuggled na produkto.

“Paano makaka-kompetensya ang Pinoy na magsasaka? Tiyak na lampaso sa labanan sa merkado. Kung dati ay kilalang producer ang Pilipinas pagdating sa agrikultura, ngayon tayo na ay mas kilala bilang importer. Di pa nakontento sa pagiging importer, ‘notorious’ agricultural smuggler pa nga ang ibang mga halang ang bituka!” ani Marcos.

“Dapat ay magkaroon na ng kasagutan kung paano tataas ang produksyon at gaganda ang kita ng mga magsasaka!”

Ayon kay Marcos hindi lamang ang tradisyonal na serbisyo ang dapat ibigay ng Department of Agriculture sa mga magsasaka kundi dapat din nitong pag-aralan ang mga problema ng sektor ng agrikultura mula sa punto de bista ng mga magsasaka mismo.

Makakatulong din umano, ayon sa senador ang Cooperative Development Authority, para i-organisa ang mga magsasaka para lumakas ang kanilang kapangyarihan sa negosasyon at sa merkado.

Kung mananalo bilang Bise-Presidente, sinabi ni Marcos na makakatulong siya para sa pakikipag-ugnayan sa mga lokal na pamahalaan, sa mga pambansang ahensya ng pamahalaan at sa Pangulo sa pagpapatupad ng mga pinakamainam na solusyon para sa todong paglago ng ating agrikultura.

“Sa ating pagkakaisa at pakikiisa, hindi malayong posibilidad na magkatotoo ang ating mga pangarap at mga plano. Mahalaga rito ang isang pinuno na maganda ang layunin, marunong, at malawak ang karanasan, at may integridad, upang maisakatuparan ang mga ito,” ani Marcos.

Back to Blog