Malaking tulong ang pagbisita ni Pope Francis para mas mabigyang-pansin ang mga batang biktima ng Bagyong Yolanda

MATINDING dagok sa mga batang naapektuhan ng Bagyong Yolanda ang kanilang karanasan. Hindi lamang pisikal, kundi emosyunal ang tama sa kanila nito.

Ayon sa Save the Children Organization, tinatayang 6 milyong bata ang naapektuhan ng ‘Yolanda’. Ang pagkawala ng kanilang mahal sa buhay o pagkawasak ng kabuhayan ay lagim sa murang kamalayan na dadalhin nila hanggang sa paglaki.

Isang napansin sa mga biktima ni ‘Yolanda’ ay ang kawalan ng pamahalaan ng komprehensibong programa para sa mga batang apektado. Kaya isinulong ang isang panukalang batas na pupuno sa kakulangang ito.

Ang Senate Bill No. 2487 (SBN 2487), o ang “Children’s Emergency Relief and Protection Act” ay nagsisiguro ng proteksiyon ng mga batang apektado ng anumang sakuna o trahedya.

Tinungtungan ng panukalang ito ang Saligang Batas na nagsasabing dapat magpatupad ang estado ng komprehensibong istratehiya upang mapangalagaan ang karapatan at kaligtasan ng mga bata sa panahon ng panganib.

Pero mas higit nating nakita ang halaga ng ating panukala, matapos tayong dumalo sa misa ni Pope Francis sa Tacloban noong nakaraang Sabado. Sa totoo lang, isinulat natin ang kolum na ito matapos ang misa ng Santo Papa.

Naging mabilis nga ang pagsusulat natin dahil doon mismo sa misa ay muli nating nakita ang mga batang naulila ni ‘Yolanda’ at nakasalamuha ang mga pamilyang winasak ng bagyo.

Parang muling kinurot ang ating puso at dala ng ating awa sa mga bata, lalo nating nakita ang kahalagahan ng ating panukala at lalong naging masidhi ang ating hangarin na mabigyan ng proteksyon ang batang biktima ng anumang uri ng kalamidad.

Sa SBN 2487, inaatasan ang Department of Social Welfare and Development (DSWD), sa pakikipag-ugnayan sa Office of Civil Defense (OCD), na balangkasin ang Comprehensive Emergency Program for Children na ipatutupad sa mga naideklarang state of calamity area.

Kabilang sa programa ang mabilisang pagbibigay ng pansamantala at permanenteng tirahan sa mga batang nawalan ng bahay pati ang pamilyang may batang miyembro, at mga batang nahiwalay sa pamilya. Ang mga bahay ay dapat sapat ang pasilidad at may pribadong silid.

Sa panukala, hangad ang pagbibigay sa mga bata at pamilya nito ng pagkain, tubig, medisina, damit, sanitary and hygiene kits, kumot, kulambo, kagamitang pangluto, flashlight, atbp.

Sapat din dapat ang tulong tulad ng atensiyong-medikal sa mga buntis, mga bagong silang at mga batang mas mababa sa dalawang taon.

Nakasaad din sa SBN 2487 ang mahigpit na pagmo-monitor sa state of calamity areas upang bantayan ang mga bata laban sa anumang uri ng pang-aabuso at karahasan. Ito ay tungkulin na inilagay natin sa balikat ng mga sundalo at pulis.

Magtutulungan din ang DSWD at pulisya na mapigil ang child trafficking, child labor, at child prostitution sa mga lugar na ito.

Tungkulin din ng DSWD na makipagtulungan sa DepEd upang mabilis na makabalik ang mga bata sa kanilang pag-aaral.

Sa post-disaster relief at recovery naman ay isinusulong upang ang mga mekanismo para sa training ng mga bata hinggil sa community disaster risk reduction program.

Ang ating paniniwala kasi ay ang kapakanan ng mga bata ay hindi dapat napapabayaan sa anumang sitwasyon kanilang kinasasadlakan sa lahat ng panahon.

At umaasa tayo na susuportahan ito sa Senado upang maaprubahan agad.

This article was published in Bulgar on 20 January 2015. Catch Sen. Bongbong’s column every Monday and Thursday.

Back to Blog