Pilipino Star Ngayon : Marcos pinulong ang economic team

By Malou Escudero | Pilipino Star Ngayon

MANILA, Philippines — Pinulong kahapon ni incoming President Ferdinand ‘Bongbong’ Marcos Jr. ang mga miyembro ng kanyang economic team sa pangunguna ni Finance Secretary-designate Benjamin Diokno.

Ayon sa Media Bureau ni Marcos, isinagawa ang meeting sa headquarters ni BBM sa Mandaluyong City.

Nabatid kay Presiden­tial Communications Ope­rations Office (PCOO) Secretary-designate, Atty. Trixie Cruz-Angeles na inilatag ni Marcos sa nasabing meeting ang kanyang mga prayoridad at naglabas ng kautusan upang makabangon ang ekonomiya na matinding tinamaan ng COVID-19 pandemic.

“During the meeting, Marcos outlined his priorities and issued his marching orders that were mostly designed to tow the eco­nomy out of the woods after being severely battered by the still lingering Covid-19 pandemic,” nakasaad sa caption ng mga larawan na inilabas ng Media Bureau ni Marcos.

Nauna rito, inihayag ni Cruz-Angeles na wala pa silang mailalabas na karagdagang impormasyon tungkol sa gagawing inagurasyon ni Marcos sa Hunyo 30.

Nakatakda namang makipag-meeting kay Marcos si US Deputy Secretary of State Wendy Sherman sa sandaling bumisita ito sa Asia upang pag-usapan ang bilateral ties.