Pilipino Star Ngayon : Hong Kong survey: Yaokasin-Chua, BBM-Sara, Tingog nag-top sa Tacloban City

21 April 2022

By Pilipino Star Ngayon

MANILA, Philippines — Kung gaganapin ang halalan ngayon, pipiliin ng mga botante sa lungsod ng Tacloban sina Jerry “Sambo” Yaokasin na tumakbo sa pagka-mayor, Edwin Chua (Vice ­Mayor), Bongbong Marcos (President), Sara Duterte (Vice President), at Tingog (Partylist), base sa isinagawang survey ng HKPH-Public Opinion and Research Center katuwang ang Asia Research Center na nakabase sa Hong Kong nitong Abril 3-8 mula sa 1,200 rehistradong botante.

Nakatanggap ng 68 porsiyento ng boto si da­ting senador Ferdinand “Bongbong” Marcos Jr., habang ang kanyang running mate na si Davao City Mayor Sara Duterte ay tumanggap ng 60 porsiyentong suporta.

Ayon sa “Pulso ng Bayan: Tacloban City 2022” survey, ang tandem nina incumbent Vice Mayor Jerry “Sambo” Yaokasin at dating Vice Mayor Edwin Chua ang “preferred choice” ng mga botante para sa mayor at vice mayor ng Tacloban City.

Batay sa mga resulta ng survey, 90% ng mga botante sa lungsod ay nagnanais ng pagbabago.

Nakatanggap si Vice Mayor Yaokasin ng 55% ng boto kumpara sa 43% ni Mayor Alfred Romualdez at inilampaso ni Atty. Edwin Chua na may score na 75% ang kanyang kalaban na si Raymund Romualdez (18%) na baguhan at walang karanasan sa serbisyo publiko.

Bagama’t magkamag-anak sina Alfred at Raymund Romualdez ni Bongbong Marcos, ang kasalukuyang Alkalde at tumatakbong Bise Alkalde ng Tacloban City, wala itong epekto sa lokal na halalan dahil gusto ng mga botante na palitan si Alfred Romualdez at mas gusto ang Yaokasin-Chua tandem. Matatandaan na sa huling pagbisita ni BBM-Sara sa kanilang grand rally sa nasabing lungsod, hindi inindorso o itinaas ang kamay ng mag-amang Romualdez.

Samantala, buo naman ang suporta ng Taclobanons sa Tingog Party-list na ang 1st nominee ay si Yedda Romualdez at lumitaw rin sa survey ang 68% performance rating ni Cong. Martin Romualdez.