Pilipino Mirror : Mga envoy ng US, Japan, S. Korea, at India bumisita kay BBM

By Pilipino Mirror

MAGKAKASUNOD na nag-courtesy call kay incoming President Ferdinand ‘Bongbong’ Marcos, Jr., ang apat na diplomats mula sa bansang Amerika, Japan, South Korea at India sa BBM Headquarters sa Mandaluyong City ngayong Lunes ng umaga.

Unang bumisita kay Marcos si Japanese Ambassador to the Philippines Kazuhiko Koshikawa dakong alas-9:00 ng umaga, kasunod si South Korean Ambassador Kim Inchul na dumating ganap na alas-10:00 ng umaga.

Bandang alas-11:00 ng umaga ay nagbigay -pugay din kay Marcos si Indian Ambassador Shambhu S. Kumaran, kasunod si US Chargé d’Affaires Heather Variava na dumating bago mag-alas-12:00 ng tanghali.

Sa pakikipagpulong kay Marcos, tiniyak ng mga envoy ang pagpapalakas sa ugnayan sa ‘trade and diplomacy’ ng kani-kanilang bansa sa Pilipinas, gayundin ang iisang layunin sa pagsusulong ng matatag na demokrasya, ‘self-determination,’ at ‘economic recovery.’

“We were able to discuss many of the things that how are we going to handle the next few years in terms of the relationship of our countries,” ani Marcos sa press conference matapos ang serye ng pakikipagpulong sa mga diplomats.