Pilipino Mirror : KAHANDAAN NG PINAS SA RCEP BUBUSISIIN NI BBM

By Pilipino Mirror

NAIS ni incoming President Ferdinand ‘Bongbong’ Marcos, Jr. na masuri muna ang competitiveness ng bansa bago ituloy ang ratipikasyon ng Regional Comprehensive Economic Partnership (RCEP) trade agreement.

“Sa aking pananaw, let’s have another look at it… Anyway, sa RCEP, tingnan natin ulit what will be the effect, pag-aralan natin nang mabuti – if we ratify it now, what will be the effect on our farming community, our farmers especially?” pahayag ni Marcos.

Kasunod ng kabiguan ng Senado na pagtibayin ang kasunduan sa kalakalan bago ang sine die adjournment ng Kongreso, ang ratipikasyon o pagtanggi ng RCEP ay nasa ilalim na ngayon ng 19th Congress sa papasok na administrasyon ni Marcos.

Sinabi ni Marcos na maganda ang RCEP dahil nilalayon nitong hikayatin ang kalakalan at lahat ng mahusay na ekonomiya ay nakikibahagi.

Gayunpaman, ipinunto niya na ang estado ng pagiging mapagkumpitensya ng bansa ay maaaring maging hadlang sa bisa ng RCEP.

Ipinaliwanag niya na ang sektor ng agrikultura ay dapat na sapat na matatag upang harapin ang kompetisyon na kasunod ng pagbubukas ng mga pamilihan.

“Ako, I’m a great proponent, a believer in trade. Walang yumaman na bansa na hindi maganda ang kanilang trade, meron silang manufacturing, meron silang ine-export , ” dagdag nito.

“They (progressive countries) are very involved in trade. All the great economies in the past, 200 to 300 years, really became rich because of trade and commerce,” pahayag pa ng incoming Chief Executive said.

Ngunit muli niyang iginiit na dapat munang tiyakin ng bansa na handa itong makipagkumpitensya sa mga kapwa miyembrong bansa bago pumasok sa kasunduan.

Lalo siyang nag-aalala tungkol sa pagiging mapagkumpitensya ng sektor ng agrikultura at ng mga lokal na magsasaka.

“So, let’s have a look at it again and make sure na hindi naman malulugi ang ating agri-sector. Pagka ni-ratify na natin ‘yan, dapat handa na ‘yung sistema natin na makipag-compete. Dahil kung hindi talaga makapag-compete, masasapawan sila, mawawala ‘yung ang ating mga local,” paliwanag pa ni Marcos.

“Panay na naman ang import natin and we don’t want that. We want to beef up the agricultural sector. We want to have sufficient food supply for the Philippines in case of any crisis.”

Ang RCEP Agreement, na nilagdaan ng Pilipinas at ASEAN Member States, Australia, China, Japan, Korea, at New Zealand noong November 15, 2020 sa 4th RCEP Leaders’ Summit, ay ang world’s largest free trade area pagdating sa global trade, GDP, FDIs, at merkado.

Binigyang-diin ng Department of Trade and Industry ang kritikal na papel ng RCEP sa pagpapalakas ng patas na paglago ng ekonomiya lalo na para sa MSMEs, sa pamamagitan ng pagpapalawak ng rehiyonal na kalakalan, serbisyo, at ugnayan sa pamumuhunan.

Sa panahon ng kampanya, iminungkahi ni Marcos na muling bisitahin ang mga umiiral na kasunduan sa kalakalang panlabas ng bansa, lalo na ang mga nakakaapekto sa agrikultura, upang masuri kung sila ay nagtatrabaho para sa kapakinabangan ng bansa.

Noong huling bahagi ng dekada ’80, ipinatupad ng Pilipinas ang mga reporma sa kalakalan na lubos na nagbukas ng ekonomiya.