Pilipino Mirror : AYUDA NI BONGBONG SA FRONTLINERS UMABOT SA BAGUIO CITY

News & Interviews
22 July 2021

By Rannie Lao | Pilipino Mirror

NAGTUNGO sa Baguio City si dating Senador Ferdinand “Bongbong” Marcos Jr. at tahimik na nagkaloob ng tulong para sa frontline health professionals.

Personal na ipinagkaloob ni Marcos, o BBM, ang mga personal protective equipment (PPEs) kay Baguio Mayor Benjamin Magalong. Nangangailangan ang pamahalaang lungsod ng protective shield para sa health workers laban sa coronavirus disease – 2019 (COVID – 19).

Ang Baguio City, na bahagi ng Cordillera Administrative Region (CAR), ay malapit kay Marcos dahil ang mga residente rito ay mga Ilokanong katulad niya.

Una rito, nagbigay si Marcos ng tulong sa tatlong bayan sa Batangas na apektado ng pag-alburoto ng Taal Volcano.

Matapos naman malaman na maraming pamilya ang nawalan ng bahay dahil sa sunog, agad na nagbigay si Marcos ng sako sakong bigas at iba pang mahahalagang pangangailangan sa mga apektadong pamilya na nasa evacuation center.

Sa isang pahayag, binigyang diin ni Marcos ang kahalagahan ng pagtulong sa nangangailangang pamilya.“With the help of some friends, we were able to pool a little assistance for those families who are facing a double-whammy – the continuing pandemic scare and losing everything they worked for in just a snap.”

Habang maraming pulitiko ang abala sa pagbira sa bawat isa, ang batang Marcos ay kumikilos upang tumulong sa mga nawalan ng tirahan sa Pateros.

Nang magtungo sa Baguio ay hindi ipinaalam ni Marcos sa mga mamamahayag sa lungsod ang paghahatid ng tulong upang makaiwas sa publicity.

Pinanatili ni Marcos na matagal nang public servant, ang pagtulong sa tahimik na pamamaraan dahil idineklara nito na ang pagtulong sa kapwa Pilipino ay dapat boluntaryo kung jobless ang pulitiko.

Kaugnay naman sa plano nito para sa presidential elections sa 2022, tahimik lamang si Marcos habang kinokonsulta ang ilang local government officials at political leaders mula Luzon hanggang Mindanao.

Lumilitaw sa survey na simula Disyembre ng nakaraang taon, isa si Marcos sa tatlong nangungunang magkakalaban para sa mataas na government position.

Sa survey nitong Hunyo, lumilitaw na may mataas na marka si Marcos sa National Capital Region (NCR) at Balance of Luzon (BL).

Bukod ito sa balwarte ni Marcos na Region 1 kabilang ang Ilocos Norte at ilang bahagi ng Visayas Region, kabilang ang Leyte na pinagmulan ng kanyang inang si dating Unang Ginang Imelda Romualdez Marcos.